Latihan Pemintal Lidah

Belajar Dialek Kuala Pilah

Ceghito Bujang Kocik Shuhud Versi Batu Kikir

                     Angin botiup sepoi-sepoi bahaso.Malam tu den ngayuh basika balik tang kendughi beghandoi ghumah kengkawan den.Siang eh paneh bedonting,malam tu tak la bumin bona.Ooo…baghu den ingat, malam tu malam Jemahat.Kojap laie kang,nak lalu jalan kubo lak.Oghang tuo-tuo kato,Kubo Loban tu kogheh.Aahh!!…memang la kogheh,yo banyak batu kek situ…

                     Tuuss!!...Laa…dah golo.Besika ni dah mulo buek hal laie.Potang tadi dah sokali ghantai eh tegajai.Nyaghih laie den nak menyungkam.Ni nak tebaghai lak deh laie.Perewel eh tak makan.Kek tompek senia lak tu.Mulo la poluh den moghombih.Ayo mak amek.Mau nak den baeh kan besika pesako onyang den ni ko dalam teng air.Maghin onyang den mawak besika ni bobidan kek ghato kampong.Raleigh oii!! Ingat koman bona ko…

                     Den nak ngumba balik poie ghumah kawan den, dah jauh bona.Ni dokek tongah-tongah.Celait tak bawak lak tu.Nyosa boto den tak bawak tadi.Den ghabo yo la memboto an ghantai besika den tu.Abih longot tangan den.Nasib baik bulan toghang.Limo boleh agak eh.Mato den jengang yo nengok nisan yang memutih tu.

                     Angin mendobut koncang.Tetibo jo den tebau bangar, sodap-sodap busuk macam bau cagu.Sekonyong-konyong… den tenampak bondo putih molayang-layang kek kubo tu...Kek bawah eh pulak ado satu bondo putih tecogok menonggok…HAH!! Apo laie…CABUUTT!!..den bukak langkah seghibu..den tingga an la besika bughok tu…Sambe mogang ikek kain pelikat, mencanak den humbeh laghi.Ghaso tak cukup tanah den bekotumpeh. Beghokek pulut samo bungo tolo ateh besika den tetingga.Nasib baik tak tesugun menyunu tanah.Sampai kek ghumah den tengok den dah pakai selua katok yo.Itu pun teboghongau koyak eh.Ontah mano kain den tecicir, den pun tak soda.Hongeh boto den.Poluh mencieh-cieh.Den tengok omak mo abah den dah ngonga tido.

                     Bongka pagi esok tu den poie la jongok balik besika den tu, kok ado pulut tu laie.Kok ado oghang nak mencilot,tak bo aka la oghang tu.Sampai kek situ, den nampak sagu sekabong tesanda yo bawah loban.Ado solai guni molayang-layang diikek kek ateh dahan loban tu.Ayo, sapo la nobang sagu bia bansai  kek situ…ubuh lak kek kubo…kok tesompok mau nak den sengkelet an…

                     Sambil nyeghet besika yang ghantai eh dah tebaghai tu… den ingat den beghani bona…heh…heh..JONGKEH TEGOLAK….